مسرحية مدرسية عن الام مكتوبة

[وردة امل]

 

 

مسرحية حب الام..فضل الام..حنان الام الحنونة

المشهد الأول:


الأم تدخل غرفة البنات لإيقاظهم


اصحى يا شروق


اصحى يا نور


ياللا علشان معاد المدرسة


نور تحتضن عروستها التى لا تفارقها





تستيقظ نور مبتسمة قائلة : صباح الخير يا خالتو


الأم: صباح النور يا روح خالتو


وتلتفت الى شروق قائلة : ياللا بقى يا شروق اصحى


شروق: يوووووه عايزه انام سيبونى


الأم : يا بنتى اصحى الوقت بيجرى


فى هذه الأثناء تقوم نور بترتيب
سريرها ...تستيقظ شروق غاضبة مبرطمة : كل
يوم صحيان بدرى كل يوم قرف


ترتسم على الام علامات الانزعاج
وتتركها ذاهبة الى غرفة
الطعام لتلحق بها نور قائلة : اساعدك يا
خالتو


الام: لا يا حبيبتى جهزى نفسك انتى روحى اتوضى وصلى والبسى


تذهب نور...تجهز الام الفطار ثم تأتى الفتاتان لتناول الافطار


الأم : ها صليتى يا نور


نور: ايوه يا خالتو الحمد لله


الأم: وانتى يا شروق


شروق: المية بارده يا ماما واحنا اتأخرنا وانا جعانه ومفيش وقت


الأم : يعنى مفيش وقت للصلاة وفيه
وقت للأكل لا حول ولا قوة الا بالله


شروق: خلاص بقى يا ماما لما ارجع


وتسترسل فى تناول الطعام متسائلة : فين
الجبنه الشيدر انا مش قلت لك تجيبى جبنه شيدر


تنظر اليها الام بغيظ وتقوم منصرفه من الغرفة وتنهض الفتاتان منصرفتين
تخرج الام مودعة لهما : فى حفظ
الله


تدخل الام الغرفة فتجد سرير نور
مرتبا نظيفا ثم تنظر الى سرير ابنتها فتجده فوضويا فتتسائل هامسة : بنت المرحومة اختى زى
النسمة عمرها ما زعلتنى ولا تعبتنى وبنتى هى اللى متعبه ومجننانى
يارب اهديها يا رب


ترتب السرير ثم تنصرف الى بقية اعمال المنزل


تعود الفتاتان من المدرسة وصوت
شروق عاليا : ماما ماما ماما


الأم: ايه يا شروق فيه ايه


شروق:انا عايزه فلوس


الأم: طيب قولى الأول السلام عليكم


شروق : وعليكم السلام هاتى ياللا
ال6 جنيه


الأم : ليه


شروق ساره صاحبتى جابت مقلمة جديدة
احلى من بتاعتى وانا عايزه اجيب زيها


الأم: ومقلمتك مالها جرى لها ايه


شروق : مش عجبانى التانيه احلى


الأم: بس دا افترا طالما مقلمتك
سليمة يبقى مفيش داعى لغيرها


شروق: يووووه اهى المقلمة مبقيتش
سليمة ( وهى ترمى بالمقلمة على الارض فيتناثر كل ما فيها


تجرى نور على المقلمة لتلتقط ما
تساقط على الارض قائلة لشروق : ليه كده يا
شروق حرام


شروق: اسكتى انتى محدش خد رأيك
متدخليش بينى وبين امى


فتطأطىء رأسها حزينة وتقوم منصرفة الى الغرفة


تغضب الأم قائلة : حتى بنت خالتك اليتيمة
مش سالمه من لسانك انتى انسانه عديمة الاحساس ومالكيش حاجه عندى


وتهم بالانصراف فتقع على الارض
نتيجة الدوار فتفزع شروق صارخة ماما
وتاتى نور جريا من غرفتها :فيه ايه


شروق : مش عارفه ماما وقعت


تقوم الفتاتان بانهاض الام متجهين الى الغرفة





مشهد





الفتاتين تتكلمان


نور: احنا لازم نسمع كلام الدكتور ونريح خالتو خالص من شغل البيت


شروق : وهنعمل ايه يعنى احنا لسه
صغيرين


نور : نعمل اللى نقدر عليه ونساعد
بعض


شروق :طيب لما اشوف هقدر ولا لا


وتنصرف الى الغرفة وتحدث نفسها
قائلة : انا لو قلت لا نور هتساعد
ماما وماما هتزعل منى ومش هتجيب لى كل اللى انا عايزاه


خلاص انا عندى فكره انا
هساعدها لغاية ما تخف بس كله بحسابه
وانا لازم اخد ثمن المساعده دى


انا هعمل جدول اكتب فيه كل
حاجه عملتها وقدامها تمنها


يعنى التوضيب مثلا اخد فيه 3 جنيه


ولو نزلت اجيب خضار اخد 2 جنيه


اما لو طبخت بقى يبقى هاخد عشرة
جنيه ..يادوب


وتعمد الى ورقة وقلم وتبدأ فى الكتابة
وعلى مدى ثلاثة ايام كل يوم تساعد فى الشقة ثم تذهب لتكتب فى الورقة ما قامت به وامامه التسعيرة التى حددتها

الى ان تمالكت الام عافيتها وقامت شاكرة للبنتين


الأم : شكرا يا نور انتى وشروق
ربنا يخليكم لى انا الحمد لله بقيت كويسة
وكل واحده تشوف مذاكرتها ياللا


تفرح شروق وتقول : ان الآوان ادى
لماما الورقة اللى كتبتها علشان تدينى
تمن مجهوداتىكلها


وتهم بالذهاب الى غرفة المكتب لكن
يستوقفها صوت نور الشجى من داخل الغرفة


نور ممسكة بصورة والدتها المتوفية
وتقول : ماما حبيبتى النهارده يوم
عيدك النهارده عيد الام كل الناس
بتحتفل ويقولوا لامهاتهم كل سنة وانتم طيبين وانا يا ماما من بعدك هقولها لمين


يا ماما انا بسمع كلامك كأنك عايشه معاى
ماما انا جبت لك هدية بس هوصلها لك ازاى ...انا هديها لخالتو خالتو حنينه زيك وانا عارفه انك هتفرحى
لما اديها لها مش كده يا ماما


تحتضن صورة والدتها وتقبلها ثم
تقول


ماما


كان نفسى افرح معاكى بس انتى سبتينى


وحشتنى كلمة يا ماما ليه منها
حرمتينى


حتى عروستى الحلوة نزلت دموع عينها


عاوزه تقول لى كلام ودموعها مانعينها


زى ما اكون امها وخايفانى اروح لبعيد


زى ما روحتى يا ماما وحزنت يوم العيد


وحزنت يوم العيد


تندفع اليها شروق مغرورقة عيناها بالدموع وتحتضنها قائلة :ياااه كل ده يا
نور وانا مش حاسه بالنعمة وكمان جبتى هدية لماما وانا رايحه اقدم لها كشف
حساب


ترد نور : لا يا شروق انتى بتحبى
مامتك بس مش حاسه الأم يا شروق تاج فوق الراس واذا كان على الهدية نقدمها لها سوا ونقول لها كل سنة وانتى طيبة


تسرح شروق للحظات فتقول :استنى يا نور الورقة ...الورقة


وتجرى نحو غرفة المكتب لتجد
والدتها ممسكة بالورقة وتقف شروق
حائرة ماذا تفعل


تقول لها الام : تعالى يا شروق


ترد شروق : ماما انا ...انا


تقاطعها الام قائلة : شروق انا
موافقة على اللى انتى كاتباه فى الورقة ..حلوه الفكره دى


شروق : ماما انا


تقاطعها الام قائلة بس يا شروق
انا كمان عايزه اقدم لك كشف الحساب بتاعى


انا شلتك فى بطنى 9 شهور والحساب
مدفوع


ورضعتك سنتين والحساب مدفوع


واعتنيت بيكى فى مرضك والحساب
مدفوع


وكبرتك وعلمتك والحساب مدفوع


انا اجرى عند الله اجرى عند
الله (تقولها بانفعال )


تهرول اليها شروق منحنية لتقبل يدها قائلة : انا اسفة يا ماما انا
غلطت ...حقك على يا امى


تحتضنها الام قائلة : انتى نور عينى يا شروق انتى وبنت خالتك دنيتى كلها


تأتى نور بالهدية قائلة لها : وانتى مامتنا يا خالتو شوفى انا وشروق جبنا لك ايه كل سنه وانتى طيبة


تفتح لها الام ذراعها مبتسمة
وتقبلها ثم تبدأ شروق قائلة : حبك يا امى يجرى فى دمى وكل غالى يرخص علشانك
وترد نور سهرتى جنبى وشلتى همى وكل ما اكبر يكبر حنانك
ويبدأ بعد ذلك اطفال الكورال بالغناء

_________________